આ દિવ્ય ધામે વર્ષભર યજ્ઞ, હવન, સત્યનારાયણની કથા, ધ્યાન, જય, અનુષ્ઠાન, ભજન કિર્તન થતા રહે છે તથા દત્ત ભક્તિના પરમ ઉપાષક અનાવિલ સંત પૂ. ગાંડા મહારાજની જન્મ જયંતિ, પૂણ્યતિથી ગુરુપૂર્ણિમા, શ્રી હનુમાન જયંતિના ધાર્મિક પર્વો ઊજવાય છે. પાદુકાપૂજન વિધિ કમિટિ સભ્યશ્રીઓ હાજર રહી યજમાન પદે બેસી ઉજવે છે.

સર્વજન માટે સમૂહ કાલસર્પદોષ નિવારણ વિધિનું પણ આયોજન આપણે કરતા રહ્યા છે. પવિત્ર શ્રાવણ માસે શુકલેશ્વર ધામે દિવ્યતાની અનુભૂતિ થાય છે. શ્રાવણ સોમવારે આ ધામે અલૂણા વ્રત તથા સોળ સોમવાર ધારિણી કિશોરીઓ તથા દર્શનાર્થીઓની મોડી સાંજ સુધી કતારો હોય છે. હરિભક્તો પદયાત્રા કરી ધામે પધારે છે. દૂધ-પાણી ના અભિષેક, બિલિપત્રો, શ્રીફળો, પુષ્પ, આદિની અર્પણવિધિથી શિવાલયમાં પ્રત્યેક પળ શ્રદ્ધા ઉમંગથી સભર બની રહે છે.

ધામે ગૌમાતા

રંગ અવધૂત આશ્રમ હરિપુરા સુરતના સંચાલક તરફથી આ સંસ્થાને ગીરગાય ભેટમાં મળેલ છે. ૨ ગાય, ૧ વાછરડી, ૧ વાછરડાની જાળવણી થઈ રહી છે. આ દૂધની ધારા મહાદેવ ઉપરના કળશમાં આવે છે. વર્ષો પહેલાં આ સંસ્થાએ ગૌશાળાનું જતન કર્યું હતું. કેટલીક પ્રતિકુળતાને કારણે આ પ્રવૃત્તિ સમેટવી પડી હતી. આજે આ સદ્કાર્ય પ્રવૃત્તિ જીવંત થઈ છે. તમારા તથા દિલાવર દાતાશ્રીઓના સહકારથી આ પ્રવૃત્તિ આગળ વધશે.

સમૂહ યજ્ઞોપવિત સમારોહ

બટુકોને યજ્ઞોપવિત સંસ્કાર આપવાનો પ્રતિવર્ષ યોજાતો સદગત છોટુભાઈ દયાળજી દેસાઈ સંદલપૂર સમૂહ જિ. નવસારી યજ્ઞોપવિત સંસ્કાર શાસ્ત્રોક્ત વૈદિક પદ્ધતિથી સાદાઈ તથા તેમના સ્વજનો તેમજ સંસ્થાના કાર્યકરોની હાજરીમાં આપવામાં આવે છે. પૂજ્ય ગાંડા મહારાજ સંસ્કાર હોલમાં આયોજનબદ્ધ પૂજાવિધિ, આવાસ, ફરાળ વગેરેની વ્યવસ્થા ખુબ જ સારી રીતે કરવામાં આવે છે. કેન્ટીન ભોજન વ્યવસ્થા તથા તૃપ્તિગૃહનો લાભ યાત્રાળુઓ, પ્રવાસીઓને મળી રહ્યો છે. આ વ્યવસ્થાઓ ધામ ખાતે કાયમી ધોરણે કરાયેલી છે. ચારે તરફ વનરાજી વચ્ચે નિર્માણ થયેલ આ સુવિધા પ્રવાસીઓને હળવાશ-શાંતિ આપે છે.

આપણું આ મંડળ સામાજિક ઉત્તરદાયિત્વ પણ નિભાવે છે. મહાશિવરાત્રી સમારોહ પૂ. ગાંડા મહારાજ સંસ્કારભવનમાં મુખ્ય મહેમાનોની હાજરીમાં યોજવામાં આવે છે. પૂર્વે જ્ઞાતિના તેજસ્વી તારલાઓ તથા વિશિષ્ઠ સિદ્ધિ મેળવનાર જ્ઞાતિજનોનું અભિવાદન તેમજ જુદા જુદા ફંડમાં વર્ષ દરમ્યાન અંકિત દાન આપનાર દાતાઓનું પણ સન્માન કરવામાં આવે છે. શૈક્ષણિક ક્ષેત્રે વિશિષ્ઠ સિદ્ધિ હાંસલ કરનાર યુવક-યુવતીઓને રજતચંદ્રક, રોકડ પારિતોષિક તેમજ અભિવાદન પત્ર એનાયત કરી સન્માન કરવામાં આવે છે. સમગ્ર સમારોહ ઉમંગ, ઉત્સાહ અને પ્રસન્નતા સભર હોય છે.

તબીબી સહાય

શ્રી રસીકલાલ મગનભાઈ દેસાઈ, કતારગામ અર્પિત બપ્પાઈબા સદગત જમનાબેન નીછાભાઇ દેસાઈ, ગં.સ્વ. શારદાબેન ઉર્ફે લલિતાબેન ખંડુભાઈ કલ્યાણજી દેસાઈ ખારા અબ્રામા શિશુ તબીબી સહાયનિધિ તથા સદગત સુમિત્રાબેન મનુભાઈ દેસાઈ ચણવઈ જનરલ તબીબી સહાયનિધિ તથા વર્ષમાં મળેલ અન્ય અંકિત દાનની રકમના વ્યાજમાંથી દર વર્ષે તબીબી સહાયનું વિતરણ કરવામાં આવે છે.

શિક્ષણ સહાય ચંદ્રકો સાથે

અનાવિલ દાતાઓ તરફથી સંસ્થાને વિદ્યાર્થીઓ માટે શિક્ષણ સહાય ફંડમાં મળેલ દાનના વ્યાજની રકમમાંથી તથા સદગત શ્રી અનુભાઈ અમુલખરાય દેસાઈ મહુવાકર ગરીબ અનાવિલ વિદ્યાર્થી સહાયનિધિમાંથી શિષ્યવૃત્તિ તથા સુવર્ણચંદ્રક, રજતચંદ્રક અને રોકડ પારિતોષિક વિદ્યાર્થીઓને દર વર્ષે આપવામાં આવે છે.

અસહાય મહિલા - વિધવા સહાય

શ્રીમતિ સુશીલાબેન ઠાકોરભાઈ મહેતા - મુંબઈ તથા શ્રીમતિ ઈંદુબેન શાંતિલાલ દેસાઈ - યુ.કે. વિધવા સહાય ફંડમાં મળેલ દાન તથા વર્ષાન્તે આ માટે જ મળેલી અન્ય અંકિત દાનોના વ્યાજમાંથી બહેનોને સહાય ઘરબેઠા પહોચાડવાની કામગીરી વ્યવસ્થાપક સમિતિના સભ્યો દર વર્ષે કરે છે.

અસહાય પુરુષોને સહાય

સદગત શાંતિલાલ રતનજી દેસાઈ - ભદેલી - યુ.કે. અસહાય પુરુષ ફંડમાં દાનની રકમના વ્યાજમાંથી પુરુષોને સહાય ઘરબેઠા પહોચાડવાની કામગીરી વ્યવસ્થાપક સમિતિના સભ્યો કરે છે.

ખેતી અને બાગકામ

શુકલેશ્વર ધામમાં આવેલ સ્વ. છીણાભાઈ હરિભાઈ દેસાઈ સાંઈવાલા, દેગામ અર્પિત જમીનમાં આવેલી આંબાવાડી - નાળિયેરી વગેરેની માવજત - દેખરેખથી દર વર્ષે સારી ઉપજ લઈએ છીએ.

શ્રદ્ધાંજલિ - આશ્વાસન પત્રો

જય શુકલેશ્વર માસિકને જે અવસાન સમાચારો મળે છે તેની નોંધ લઇ આપણે સદગતને શ્રદ્ધાંજલિ અર્પિત કરતા રહ્યા છે. વર્ષ ૨૦૦૫ થી આપણે દક્ષિણ ગુજરાતના દૈનિકોની અનાવિલ અવસાનની જાહેરખબરને આધાર માની સદગતના પરિવારને આશ્વાસન પત્રો ધામેથી પાઠવવાનું શરુ કરેલ છે. પ્રતિભાવો સારા રહ્યા છે. તેમને હુંફ મળી છે તો કેટલાક પરિવારોએ ઋણ સ્વીકાર કરી સદગતની સ્મૃતિમાં દાનો પણ મોકલે છે.